Өңір басшысы Берік Уәли көлдің табиғи бірегейлігі мен тарихи маңызын атап өтті. Оның сөзінше, Алакөл Қазақстанның түкпір-түкпірінен, сондай-ақ көрші елдер мен алыс шетелдерден демалушыларды тартады.
Фестиваль бағдарламасы
«Алакөл оттары» фестивалі алғаш рет өткізіліп отыр. Концерттер тамызға дейін аптасына екі рет — сәрсенбі және сенбі күндері жалғасады. Сахнада облыс қалалары мен аудандарының әртістері, сондай-ақ «Абай елі — өнер кеніші» байқауының қатысушылары өнер көрсетеді.
Алғашқы кеште көрермендер Қазақстанның халық әртісі Секен Тұрысбектің, Дінісламбек Жайлаубайдың, Дана Кентайдың, Еркеш Хасеннің, Қанай мен Зарина Омаровалардың өнерін тамашалады. Мереке отшашумен аяқталды.
Маусымға дайындық
Маусым ашылғанға дейін жағалауда инфрақұрылым жаңартылды. 50-ден астам санитарлық-гигиеналық нысан, 35 душ кабинасы, 110 киіну кабинкасы, 100 жаңа қоқыс контейнері және 150 қалдық контейнері орнатылды.
Жағалау бойына 5 мың метр қорғаныс қоршауы монтаждалды. 224 бейнебақылау камерасы жұмыс істейді. Соңғы екі жылда 10 шақырым жол асфальтталды.
Биыл үкіметтің қолдауымен «Көктал — Алақөл» электр желісінің 72 шақырымдық құрылысы басталды. Жоба жағалаудағы электр энергиясының тапшылығы мәселесін шешуге тиіс.