Жыл басынан бері департаментке 446 өтініш келіп түсті. Мамандар 126 тексеру жүргізіп, 132 материалды денсаулық сақтау басқармасына, Әлеуметтік медициналық сақтандыру қорының филиалына және басқа органдарға жіберді.
Көбіне тұрғындар медициналық көмектің сапасына шағымданды — 58 өтініш. Тағы 43-і дәрі-дәрмекпен толық қамтамасыз етілмеуіне қатысты болды. 16 арыз медициналық көмектің қолжетімділігі мен ұйымдастырылуына, 14-і диагнозбен немесе медициналық-әлеуметтік сараптамаға жіберуге келіспеушілікке байланысты болды. Екі өтініш аурухана парақшаларын беру мәселесіне қатысты.
133 жоспардан тыс тексеру жүргізілді. 56 жағдайда өтініш берушілердің дәлелдері толық расталды, 48 жағдайда ішінара расталды.
Тексерулер нәтижесінде және құқық қорғау органдарынан келіп түскен материалдар бойынша 160 әкімшілік құқық бұзушылық туралы хаттама жасалды. Айыппұлдардың жалпы сомасы 28 млн 144 мың 995 теңгені құрады, деп хабарлады департамент басшысының міндетін атқарушы Айгуль Садыкова.
Ведомствода елдегі медициналық қызметтің барлық түрі міндетті лицензиялауға жататыны, ал ұйымдар біліктілік талаптарын сақтауға тиіс екені еске салынды.
Шымкентте 2024 жылғы 1 шілдеден бастап өндірілген немесе әкелінген дәрі-дәрмектерді міндетті таңбалау жүйесі енгізілуде. Ақпараттық жүйеде екі отандық өндіруші, 48 көтерме сауда нысаны және 652 бөлшек сауда желісінің нысаны тіркелген. Таңбалау препараттың өндірушіден сатып алушыға дейінгі жолын қадағалауға және контрафактімен күресуге мүмкіндік береді.
Медициналық ұйымдар мен дәріханалар таңбаланған дәрі-дәрмектердің түсуін жүйеде уақтылы көрсетуге және оларды айналымнан дұрыс шығаруға міндетті.