Тараптар сауда-экономикалық ынтымақтастықтың өзекті мәселелерін, өзара тауар айналымын арттыру, инвестициялар тарту және екі елдің іскер топтары арасындағы байланыстарды дамыту мүмкіндіктерін талқылады.
Тауарлардың Қазақстан мен Швеция нарықтарына қолжетімділігін жеңілдету, техникалық кедергілерді жою, логистика мен кеден рәсімдерін жақсарту мәселелеріне ерекше назар аударылды.
Экспорттаушыларды қолдау және өнеркәсіптік кооперация
Қазақстан тарапы экспорттаушыларға көмек көрсету және тікелей іскерлік байланыстар орнату мақсатында QazTrade-дің Швецияның Ұлттық сауда кеңесімен және Business Sweden-пен өзара әрекеттесуін тереңдетуді ұсынды.
Кездесу қатысушылары Hyundai Trans Almaty мен Volvo Group арасындағы меморандумға қол қойылғанын құптады. Жобаның іске асырылуы машина жасауды дамытуға, жаңа өндірістік қуаттарды құруға, инвестициялар тартуға және Қазақстанның экспорттық әлеуетін арттыруға ықпал етуі тиіс.
Швед бизнесі және жаңа комиссия
Қазақстан жетекші швед компанияларымен, соның ішінде IKEA дүкендерінің ашылу мүмкіндігін қарастыру арқылы ынтымақтастықты дамытуға дайын екенін білдірді. Тараптар сауда-экономикалық және инвестициялық ынтымақтастық жөніндегі қазақстандық-шведтік комиссия құрудың маңыздылығын атап өтті.
Келіссөздер қорытындысы бойынша серіктестікті нығайту, инвестицияларды кеңейту және бірлескен жобаларды іске асыруға өзара мүдделілік расталды. Бұған дейін елдер осы мәселелер бойынша екіжақты комиссия құрған болатын.